Ju përgëzoj për cilësinë e mirë të botimit të "Atlasit të farmakologjisë". Është një libër i nevojshëm për shumë mjekë të shumë specialiteteve, duke pasur parasysh edhe që literatura mjekësore në gjuhën shqipe është shumë e pakët.

Grac - Austri, 11 shtator 2005
Argjend Krasniqi, student i mjekësisë

Qe një mjek ta zotërojë plotësisht profesionin e vet, është nevojë e domosdoshme t'i mësojë zhvillimet më të reja të shkencës së mjekësisë që po përparon me hapa mjaft të shpejtë. Këto të reja studiuesi i mjekësisë mund t’i mësojë, ndër të tjera edhe nga literatura mjekësore, që për fat të keq në gjuhën tonë është ende shumë e varfër.
Libri "Atlasi i Farmakologjisë" është një shembull shumë i mirë se si duhet te pasurohet literatura e mjekësisë në gjuhën shqipe. Edhe pa ekzistuar problemi i literaturës, farmakologjia është një lëndë mjaft e vështirë, sepse janë gjithë ato barna të ndara në grupe e nëngrupe, gjithë ata emra latinë, gjithë ato doza, indikacione,efekte anësore, kundërindikime, ndërveprime të barnave, e gjëra të tjera që duhet mbajtur mend. Këto i krijojnë studiuesit të mjekësisë huti dhe stres, prandaj “Atlasi i Farmakologjisë” është shumë i vlefshëm. Ilustrimet e bëra në këtë libër, tabelat dhe format tjera shumë të përshtatshme dhe të thjeshta me të cilat janë shpjeguar problemet ia lehtësojnë shumë punën studiuesit.
Derisa vendi ynë ende nuk ka institute të mirëfillta të hulumtimeve shkencore nga të cilat mund të nxirren përfundime, shkrimi i librave do te ishte, në të shumtën e rasteve, nëse jo plagjiaturë, atëherë një remiks jo i qëlluar dhe i mundimshëm për studentin. Për këtë arsye rruga më e drejtë, për të mos thënë e vetmja tash për tash, për ta pasuruar literaturën në gjuhën tonë është përkthimi i librave të suksesshëm nga gjuhët e huaja. Këtë rrugë jo të lehtë po e ndjekin me mjaft sukses përkthyesit e librit “Atlasi i Farmakologjisë”, të cilët kanë bërë një punë shumë të vyer dhe duhet falënderuar.