Përfaqësuesi i rrjetës studentore Mara Foundation, z. Irmin van der Meijden dhe përfaqësuesi i Shtëpisë Botuese ALB-MED, z. Adnan Emini, vizituan gjashtë kurse në Universitetin veror Prishtina 2006. Me këtë rast 125 studentëve të këtyre kurseve iu dhuruan 125 libra nga botimi më i ri i ALB-MED “Fakte shëndetësore – shëndeti riprodhues dhe parandalimi i shtatzënisë”.

Ky bashkëdonacion është në vazhdën e donacioneve dhe ndihmës së vazhdueshme të cilën Mara Foundation dhe Shtëpia Botuese ALB-MED janë duke e bërë në ndihmë studentëve të fakultetit të mjekësisë në Prishtinë. Vitin e kaluar në të njëjtën kohë të dy këto organizata ndihmuan Bibliotekën e Fakultetit të Mjekësisë në Prishtinë me 22 ekzemplarë të Atlasit të farmakologjisë, për të plotësuar nevojat e shfrytëzueseve të kësaj biblioteke.

Mara Foundation, pas luftës e deri më tani, ka sjellë shumë ndihma në të gjitha pjesët e Kosovës. Ajo vazhdon të ndihmojë edhe tani dhe do të jetë aktive edhe vitet e ardhshme. Me këtë Mara Foundation po dëshmon se vazhdon t’i përcjell hapat e qeverisë Holandeze në përkrahjen e arsimit të lartë në Kosovë.

ALB-MED, edhe pse shtëpi e re botuese, deri më tani ka mbështetur nxënësit dhe studentët në Shqipëri, Kosovë dhe Maqedoni në forma të ndryshme, duke dhuruar për bibliotekat e shkollave ose fakulteteve dhe duke ofruar zbritje të çmimit për studentët.